L O A D I N G
logo

"Хууль сахиулагч" клуб

Хууль сахиулахын их сургуулийн Цагдаагийн сургуулийн Мөрдөх албаны тэнхимийн дэргэдэх “Хууль сахиулагч клуб” нь  тэнхимийн ахлах багш, цагдаагийн ахмад Я.Цэлмэнгийн санаачилгаар 2012 оны 12 дугаар сарын 11-ний өдөр үүсгэн байгуулагдсан.

Клубын эрхэм зорилго нь ХСИС-ийн эрхэм зорилгыг дээдэлж, сонсогч оюутнуудынхаа сурч боловсрох, соён гэгээрэх, өөрийгөө хөгжүүлэх, чөлөөт цагаа зөв боловсон өнгөрүүлэхэд дэмжлэг туслалцаа үзүүлэх, орчин үеийн хэрэгцээ шаардлагад нийцсэн хууль сахиулах дадлага ажлаар хангах, хууль сахиулах ажлын дадлага туршлага, мэдлэг чадвартай, бүтээлч хандлагатай сонсогч, оюутнуудыг олноор төрүүлэхийн сацуу тэдэнд эх оронч үзэл төлөвшүүлэхэд оршдог.

"Хууль сахиулагч клуб" нь Хууль сахиулахын их сургуулийн анхны хүндэт доктор, хошууч генерал Д.Сандаг-Очирын нэрэмжит бөгөөд тус клубын үйл ажиллагааг Цагдаагийн сургуулийн удирдлага, тэнхимийн багш нар тогтмол дэмжиж ажилладаг ба үйл ажиллагаа нь өргөжин тэлж клубын гишүүн болох сонирхолтой суралцагчдын тоо жил ирэх тусам нэмэгдэж байна.

"КОНСЕНСУС" КЛУБ

Тус клуб нь анх 2004 онд байгуулагдсан бөгөөд парламентын мэтгэлцээнийг хөгжүүлэх, түүнийг сонирхогчдыг нэмэгдүүлэх, сонсогч, оюутнуудын илтгэх, мэтгэлцэх ур чадвар, соёлыг дээшлүүлэх, тэдэнд илтгэх болон мэтгэлцэх урлагийг ойлгуулан таниулах зорилготойгоор байгуулагджээ.

Тус клубт Цагдаагийн сургуулийн ахлах багш, цагдаагийн ахмад Н.Манлайбаатар, цагдаагийн ахлах дэслэгч Г.Амаржаргал, багш, цагдаагийн ахлах дэслэгч Б.Даваажав, МҮОНРТ-ийн хуулийн зөвлөх, Хил хязгааргүй хуульчид төрийн бус байгууллагын удирдах зөвлөлийн гишүүн Б.Оюунбилэг, Б.Тунгалагнаран, СБД-ийн цагдаагийн хэлтсийн мөрдөн байцаагч, цагдаагийн ахлах дэслэгч Х.Сэлэнгэ, ЭЦГ-ын эдийн засгийн гэмт хэрэгтэй тэмцэх хэлтсийн төлөөлөгч, цагдаагийн ахлах дэслэгч О.Лхамсүрэн, Б.Эрдэнэбилэг, н.Саруултөгөлдөр, Э.Шижир, н.Золзаяа нар анхдагч гишүүд байсан юм.

Эдгээр авяъаслаг, чадварлаг залуучуудын залгамж халаа болж БЗД-ийн цагдаагийн хэлтсийн мөрдөн байцаагч, цагдаагийн дэслэгч Х.Түвшинбаяр, Багануур дүүргийн цагдаагийн хэлтсийн жижүүрийн офицер, цагдаагийн дэслэгч н.Сэргэлэнбаатар, Хэнтий аймгийн хэсгийн төлөөлөгч, цагдаагийн дэслэгч н.Зориг-Эрдэнэ, Хөвсгөл аймгийн Шүүхийн шинжилгээний албаны шинжээч, цагдаагийн дэслэгч Д.Ганзориг, шинжээч, цагдаагийн дэслэгч н.Баяраа нар уран илтгэл, парламентын болон шүүхийн мэтгэлцээний тэмцээн уралдаануудад амжилттай оролцож байжээ.Тус клубын гишүүдээс

  • 2004, 2005 оны Парламентын мэтгэлцээний Улсын аварга,
  • 2005 оны Шүүхийн мэтгэлцээний Улсын аварга,
  • 2004, 2005, 2006 оны Парламентын мэтгэлцээний Улаанбаатар хотын аварга,
  • 2006, 2007 оны хотын аварга шалгаруулах парламентын мэтгэлцээний тэмцээний 3 дугаар байр
  • 2006 оны Шүүхийн мэтгэлцээний үндэсний аварга шалгаруулах тэмцээний 3 дугаар байр
  • 2007 оны хотын аварга шалгаруулах шүүхийн мэтгэлцээний тэмцээний 3 дугаар байр
  • 2009 оны “улсын аварга шалгаруулах Парламентын мэтгэлцээний анхдугаар тэмцээн”-ий тэргүүн байр,
  • 2010 оны “Нөхөрсөг мэтгэлцэгчдийн парламентын мэтгэлцээний тэмцээн”-ий тэргүүн байр
  • 2010 оны “Байгаль орчноо хамгаалахад оюутан залуусын оролцоо чухал” сэдэвт парламентын мэтгэлцээний тэмцээний дэд байр,
  • 2010 оны “Улаанбаатар хотын аварга шалгаруулах Захиргааны хэргийн шүүхийн мэтгэлцээн”-ий гуравдугаар байр,
  • 2010 оны “Улаанбаатар хотын аварга шалгаруулах парламентын мэтгэлцээний тэмцээн”-ий гуравдугаар байр
  • 2013 онд Эрүүгийн хэргийн шүүхийн мэтгэлцээний аварга шалгаруулах тэмцээний 2-р байрын шагналыг тус тус хүртсэн байна.

Түүнчлэн Х.Түвшинбаяр, 221 дүгээр дамжааны сонсогч Н.Идэрзориг нар 2011 онд Үндэсний шилдэг уран илтгэгчээр тус тус шалгарч байсан амжилтуудыг үзүүлж байжээ.

Одоо тус клуб нь Цагдаагийн сургуулийн ЭБШ эрх зүйн тэнхимд харъяалагддаг бөгөөд ахлах багш, цагдаагийн ахлах дэслэгч Г.Амаржаргал удирдан ажиллаж байна.

"Мөрдөгч" клуб

"Гэмт явдал судлал" клуб

Гэмт явдал судлал клуб нь анх 2001 онд Цагдаагийн академийн Эрүүгийн эрх зүйн болон Криминологийн тэнхимийн дэргэд ахлах багш Бадамын Батзоригын санаачилгаар “Сонсогч оюутны бүтээлч сэтгэлгээг хөгжүүлэх, эрдэм шинжилгээ судалгааны ажил бичихэд дур сонирхолтой болгох ур чадвар эзэмшүүлэх, сурах арга барил, дадал эзэмших, бие даан суралцах, хувийн зохион байгуулалт, цагийг үр бүтээлтэй ашиглах, гишүүдийн ажил, хариуцах чадвар, мэдлэг, сахилга, хариуцлага, сурлага болон багаар хамтран ажиллах чадварыг дээшлүүлэхэд оршино” хэмээх зорилгоор 34  гишүүнтэйгээр байгуулагдаж одоо Эрүүгийн эрх зүйн тэнхимийн дэргэдэх “Гэмт явдал судлал” клуб нэртэйгээр үйл ажиллагаа явуулах чиглэл, дотоод дүрэм, журмаа батлан 42 гишүүний бүрэлдэхүүнтэйгээр үйл ажиллагаагаа идэвхитэй явуулж байна.

Тус клуб нь 2011 оны 11 сарын 3-нд клуб үүсгэн байгуулагдсаны 10 жилийн ойг тэмдэглэж дээрх хугацаанд 500 гаруй сонсогч, оюутан гишүүнээр элсэн суралцсан ба тэдний оролцоотойгоор үйлдэгдэж буй гэмт хэргийн шалтгаан, нөхцлийг судлах, гэмт хэргийн гаралтыг бууруулах чиглэлээр олон төрлийн арга хэмжээг төрийн болон төрийн бус байгууллагатай хамтран зохион байгуулж, тэдний талархлыг хүлээсээр ирсэн. Энэхүү арга хэмжээний үеэр клубыг үүсгэн байгуулагч Авлигатай тэмцэх газрын судалгаа шинжилгээний албаны дарга Бадамын Батзориг болон манай клубтэй хамтран ажилладаг Баянзүрх дүүргийн цагдаагийн хэлтсийн нийгмийн хэв журам хамгаалах тасгийн дарга, хэсгийн байцаагч, урамшилт эргүүлүүд, ерөнхий боловсролын сургуулийн захирал, Монголын үндэсний дээд сургуулийн “Шударга ёс” клуб, Дотоод хэргийн их сургуулийн Цагдаагийн сургуулийн захирал, эрүүгийн эрх зүйн тэнхимийн хамт олон зэрэг 300 гаруй хүн тус арга хэмжээнд идэвхтэй оролцсон. Мөн Эрүүгийн эрх зүйн тэнхимийн эрхлэгч, доктор, профессор, цагдаагийн хурандаа Г.Гантөмөр хамтран ажилладаг Баянзүрх дүүргийн цагдаагийн хэлтсийн хамт олон, 23 дугаар хорооны урамшуулалтай эргүүлийн хамт олонд дурсгалын зүйл гардуулсан.

2013 оны "Гэмт явдал судлал" клубын нээлтийн үйл ажиллагаа



Клубын явуулдаг үйл ажиллагааны талаар дурьдвал:

  • Нийслэлийн дүүргүүдийн зарим хороог сонгон авч гарч буй гэмт хэрэг, зөрчлийн шалтгаан нөхцлийг судалж, гэмт хэргээс урьдчилан сэргийлэх, гэмт үйлдлийг таслан зогсоох талаар төрийн болон төрийн бус байгууллага, аж ахуй нэгж, иргэдтэй хамтран олон төрлийн арга хэмжээг зохион байгуулдаг.
  • Нийслэлийн зарим ерөнхий боловсролын сургуулиудтай хамтран ажиллаж, насанд хүрээгүй хүний үйлддэг гэмт хэргийг бууруулах, гэмт хэрэг хэрхэн бий болдог, хууль эрх зүйн ойлголт, гэмт хэргээс өөрийгөө болон бусдыг хамгаалах, тэдний ар гэр, сурах орчин хэрхэн бүрддэг, нийгмийн ажилтан суралцагчидтай хэрхэн тулж ажилладаг зэрэг сургалт, сурталчилгааны талаар үйл ажиллагаа явуулдаг.
  • Клубын гишүүд болон бусад сонсогч, оюутны мэдлэг, чадвар, сурлага, сэтгэхүйг сайжруулах чиглэлээр эрдэмтэн багш нарыг урьж сургалт, семинар зохион байгуулдаг.
  • Баянзүрх дүүргийн “Наран туул” олон улсын худалдааны төвийн цагдаагийн тасагтай гэмт хэргээс урьдчилан сэргийлэх чиглэлээр хамтран ажиллаж байна.

Клубын удирдах бүрэлдэхүүн

Эрүүгийн эрх зүйн тэнхимийн ахлах багш, цагдаагийн ахлах дэслэгч Л.Бат-Очир, тэнхимийн багш Б.Мөнхзул, тэнхимийн багш Э.Золбоо нарын удирдлаган дор

  • Клубын тэргүүн 331 дүгээр дамжааны ахлах түрүүч Ц.Хүрэлбаатар,
  • Дэд тэргүүн 331 дүгээр дамжааны дэд түрүүч Ө.Мишээл,
  • Нарийн бичгийн даргаар 332 дугаар дамжааны дэд түрүүч Б.Соронзонбаатар нар ажиллаж байна.

Клубын гишүүд "Гэмт хэргээс урьдчилан сэргийлэх" ажиллагаа явуулж байгаа нь

"Цагдаа судлал" клуб

“ЗАЛУУ НИЙГМИЙН АЖИЛТАН" КЛУБ

Дотоод хэргийн их сургуулийн Шүүхийн шийдвэр гүйцэтгэлийн сургуулийн Нийгмийн ажил, сэтгэл зүйн тэнхимийн дэргэдэх “Залуу нийгмийн ажилтан” клуб нь 2017-2018 оны хичээлийн жилд “Нийгмийн ажил” мэргэжлээр бакалаврын хөтөлбөр хэрэгжүүлж эхэлсэн.
Тухайн хөтөлбөртэй уялдуулан 2018-2019 оны хичээлийн жилээс дээрх хөтөлбөрийг сонгон суралцаж буй сонсогчдыг хамруулан клубын үйл ажиллагааг 2018 оны 10 дугаар сарын 1-нээс эхлүүлэн ажиллаж байна.
Клубын зөвлөх багшаар Нийгмийн ажлын тэнхимийн багш, ахмад Г.Батжаргал ажиллаж зөвлөн чиглүүлдэг.
“Залуу нийгмийн ажилтан” клубын дүрмийг боловсруулан батлуулж, мөрдөн ажиллаж байна.
Дүрмийн дагуу гишүүдийн саналаар клубын удирдагчаар 533 дугаар дамжааны сонсогч Э.Анужин сонгогдож, 30 гаруй гишүүнчлэлтэйгээр үйл ажиллагаагаа явуулдаг.
  “Клубын үйл ажиллагааны үндсэн чиглэл”, “Клубын зөвлөх, удирдагч, гишүүнчлэл”, “Клубын гишүүдийн үүрэг”, “Клубын гишүүдэд хориглох зүйлс”, “Клубын санхүүжилт” зэргийг дүрэмдээ тусган мөрдөн үйл ажиллагаагаа явуулж байна.
“Залуу нийгмийн ажилтан” клубын зорилго нь “нийгмийн ажил” мэргэжлээр суралцаж буй сонсогчдод мэргэжлийн итгэл үнэмшил төлөвшүүлэх, хамтран суралцаж, хөгжих боломжийг бүрдүүлэх, нийгэмд тулгамдаж буй асуудлыг олон талаас нь харж, шийдвэрлэх арга замыг эрэлхийлдэг ур чадвар эзэмшүүлэх явдал юм.
Клубын уулзалт, сургалтыг 7 хоног бүрийн лхагва гариг бүр зохион байгуулдаг.
 
            Клубын үйл ажиллагааны үндсэн чиглэл нь:
  • Сургалт зохион байгуулах
  • Нийгэм болон нийгмийн ажлын үйлчилгээнд тулгамдаж буй асуудлыг хөндсөн хэлэлцүүлэг, мэтгэлцээн зохион байгуулах
  • Асуудлыг шийдвэрлэх арга замыг эрэлхийлэх
  • Нийгмийн ажлын мэргэжлийн практик дадлага, туршлагад суралцах
  • Олон нийтийн ажил, сайн үйлсийн үйл ажиллагаанд оролцох
  • Бусад их, дээд сургуулийн нийгмийн ажлын мэргэжлээр суралцдаг оюутнуудтай хамтран үйл ажиллагаа зохион байгуулах

“ХАРУУЛ ЗАНГИ” КЛУБ

Хилийн албаны сургуулийн Хилийн албаны тэнхимийн дэргэдэх “Харуул занги” клуб нь Дотоод хэргийн их сургуулийн 80 жилийн ой, Хилийн албаны тэнхимийн 40 жилийн ойг угтан 2014 оны 3 дугаар сарын 20-ны өдөр байгуулагдсан.
Клубын зорилго:
“Харуул занги” клуб нь Цэргийн болон Хил судлалын шинжлэх ухаан, бусад шинжлэх ухааныг танин мэдэх суралцагчдыг хөгжүүлэх, судалгаа шинжилгээний ажилд сургах, дадлагажуулах, зохион байгуулах, мэдлэг, дадлага, чадвар олгоход оршино.
Клубын зорилт:
  1. Сонсогчдын хөгжлийг эрхэмлэн гишүүдийн боловсрол, хүмүүжлийг дээшлүүлэх
  2. Гишүүдийг шударга, эх оронч, хилч үзэлтэй манлайлагч болгон суралцуулах
  3. Гишүүдийн авьяас, чадварыг нээн хөгжүүлж, зорилго, тэмүүлэлтэй, урлаг, спортод дуртай, эрүүл чийрэг болгон төлөвшүүлэх
  4. Гишүүдийг номтой нөхөрлүүлэх, судалгааны ажилд сурган дадлагажуулах
  5. Гишүүдийг цэрэгжилч, жагсаалч, соёлч, дүрэмч ажиллагаанд сургах, сонсогчдод зөв үлгэрлүүлэх
Гурав. Клубын бүтэц:
1.Ерөнхий зохион байгуулагч (Хилийн албаны тэнхимийн эрхлэгч)
2.Зохион байгуулагч (Хилийн албаны тэнхимийн багш нар)
3.Нарийн бичгийн дарга
4.Гишүүдээс бүрдэнэ.
 
 

“ТӨГС УХААН” ШАТРЫН КЛУБ

Дотоод хэргийн их сургуулийн Эрх зүй, нийгмийн ухааны сургуулийн дэргэдэх “Төгс ухаан” шатрын клуб нь 2006 онд үүсгэн байгуулагдсан.
“Төгс ухаан” шатрын клуб нь сонсогч, оюутнуудын сэтгэх чадварыг хөгжүүлэх, шатрын спортыг түгээн дэлгэрүүлж, таниулах, оюутнуудын логик сэтгэлгээг хөгжүүлэх, стратеги боловсруулах зэрэг чадварт суралцуулах, шатар сонирхогчдод зориулсан төрөл бүрийн тэмцээн уралдаан, сургалт   зохион байгуулах, тэдний ур чадварыг дээшлүүлэх, чөлөөт цагийг үр дүнтэй өнгөрүүлэх зорилготой юм.
Клубын үүсгэн байгуулагч, тэргүүн нь ЭЗНУС-ийн Нийгмийн ухааны тэнхимийн ахлах багш, цагдаагийн хошууч, шатрын спортын дэд мастер Д.Дэмбэрэл, дасгалжуулагчаар Ахлагчийн сургуулийн багш, цагдаагийн хошууч, спортын мастер Д.Гандуулга ажилладаг.
Их, сургуулийн багш, алба хаагч, сонсогчид тус клубын сургалтад хамрагдсанаар улсын хэмжээний болон яам, агентлагуудаас зохион байгуулсан шатрын тэмцээнд өндөр амжилт үзүүлж, 30 гаруй медаль өргөмжлөл хүртсэн түүхтэй.
Одоогоор тус клуб нь 20 гаруй шатар, арван шатрын цаг, нэг ханын шатар бүхий хэрэглэгдэхүүн, 50 орчим гишүүнтэйгээр үйл ажиллагаа явуулж байна.
 "Төгс ухаан" шатрын клуб нь хичээлийн төв байрны 4 давхар 429 тоотод байрладаг.

“МӨРДӨГЧ” КЛУБ

Цагдаагийн хурандаа З.Төрмандах, цагдаагийн хурандаа “Ц.Жамъяансэнгээ сан”-гийн санаачилгаар Гүйцэтгэх ажлын хичээлээр “Мөрдөгч” дугуйланг 2008 онд  нээж Хүндэт чекист, цагдаагийн хурандаа Ц.Жамъяансэнгээ агсаны нэрэмжит “Мөрдөгч” клуб нэртэйгээр үйл ажиллагааг явуулж эхэлсэн.
“Мөрдөгч” клуб нь Дотоод хэргийн их сургуулийн Цагдаагийн сургуулийн үндсэн ангийн 2,3,4-р дамжааны сонсогчдыг “Тагнах үйл ажиллагааны эрх зүй, тактик”-ийн хичээлээр онолын мэдлэгийг гүнзгийрүүлэн судлуулах, тодорхой дадал чадвар эзэмшүүлэх, эрүүгийн албаны мэргэшсэн боловсон хүчин бэлтгэх, тагнах үйл ажиллагааны судалгаа шинжилгээ хийлгэх, клубын гишүүн сонсогчдыг гэмт хэрэгтэй тэмцэх хүсэл сонирхолтой болгох, багаар ажиллах чадварт сургах, дадлагажуулах явдал юм.
        Хүндэт чекист Цагдаагийн хурандаа Ц.Жамъяансэнгээ нь 1950 онд Сэлэнгэ аймгийн Сүхбаатар сумын нутагт малчны гэр бүлд төрсөн. 1968-1972 онд Улаанбаатар хотод Цэргийн ерөнхий дээд сургуулийн хуулийн анги, 1986-1988 онд ОХУ-ын ДЯЯ-ны Академид тус тус суралцаж төгссөн.
            1972-1980 онд УЦСЕГ-ын эрүүгийн хэргийг эрэн сурвалжлах хэлтэст төлөөлөгч, ахлах төлөөлөгч, тасгийн дарга, 1980-1981 онд ЗХБГУ-ын гүйцэтгэх албаны хэлтсийн тасгийн дарга, 1981-1985 онд УЦСЕГ-ын ЭХЭС хэлтсийн дарга, 1988-1990 онд Улаанбаатар хотын ЦСГ-ын орлогч бөгөөд гүйцэтгэх албаны дарга, 1992-1996 онд ЦЕГ-ын дэд дарга бөгөөд ЭЦГ-ын дарга, Интерполын Монголын үндэсний товчооны дарга, 1996-1999 онд Улаанбаатар хотын Цагдаагийн газрын дарга, 1999 оноос Улсын ерөнхий прокурорын орлогчоор тус тус ажиллаж байсан.
“Мөрдөгч” клуб нь өөрийн дүрэмтэй бөгөөд Хууль сахиулахын их сургуулийн Цагдаагийн сургуулийн үндсэн ангийн 2,3 дугаар дамжааны сонсогчдоос сонгон шалгаруулж авдаг.
Сонгон шалгаруулалтыг тест, IQ чадвар, ярилцлага гэсэн гурван чиглэлээр явуулдаг.
       “Мөрдөгч” клуб нь хүндэт чекист, цагдаагийн хурандаа Ц.Жамъянсэнгээгийн нэрэмжит өөрийн “Мөрдөгч” гэсэн таних тэмдэг болон гишүүний үнэмлэхтэй.   
       “Мөрдөгч” клубын сонсогчдоос жил бүр амжилттай суралцсан хоёр  сонсогчийг Хүндэт чекист, цагдаагийн хурандаа Ц.Жамъянсэнгээ агсны гэр бүлээс “Ц.Жамъяасэнгээ сан”-гийн тэтгэлэг олгодог уламжлалтай.